Su Progetu

Su fèstival literàriu "Sas Puntas" naschet in Tissi cun s'intentu de trisinare in s'initziativa editores, iscritores, letores, bloggers, giornalistas, libràrgios, crìticos literàrios, assòtzios e amministratzione pùblica.
S'idea de su Festival est sa de fraigare un eventu pro fàghere bìvere sa bidda e promòvere progetos artìsticos chi allegrent e inrichent sos tzitadinos, cun s'intentu de realizare duas dies suta s'insigna de sa letura e de sa sotzialidade pro iscreditare su logu comunu pro chi su chi est culturalmente de importu est tristu, a manera de inganatzire mescamente giòvanos a connòschere formas de arte chi potzant ispronare sa creatividade issoro e sa fantasia issoro, cosas chi in tempos modernos parent cunfinadas in s'àmbitu de sa retza. 
Sas istòrias in su tzentru de sos eventos de su fèstival ant a èssere contadas, in ue possìbile, dae sos autores matessi, a traesse leturas e interpretatziones poèticas. S'idea de su Fèstival est sa de fàghere bìvere sos logos istòricos de sa colletividade (Ex Mà e pratzas de sa bidda), ma finas logos de s'Istòria nostra, che a su situ de s'Ipogeu Sas Puntas. 
Su Fèstival est cumpostu dae prus momentos, dae dibatas, addòbios, intramesas musicales, installatziones e mustras, in sa prospetiva de una sinergia intre sas formas artìsticas diversas, in un'atmosfera de festa chi punnat a trisinare impare totu sas fàscias de edade, in un'intritzu culturale cun prus isfatziddaduras. Sos ispetàculos vàrios chi s'ant a acumprire in intro de su Fèstival ant a èssere lìberos e in de badas, a fines de rèndere atzessìbile rapresentatziones chi a sòlitu si cunsìderant "de élite".